DAVAO CITY – Niatubang pag-usab sa mga myembro sa media si kanhi Pangulong Rodrigo Duterte atol sa nahitabong press briefing dinhi sa Davao City kagabii, Pebrero 27.
Atol sa nahitabong pakighinabi sa kanhi mayor ug pangulo, gibarugan pag-usab ni Citizen Digong ang naunang pamahayag sa nahitabong prayer rally sa Cebu nga suportado niya ang bisan unsang amendments sa Phillippine Constitution apan gawas lamang sa political nga kausaban sama sa term extension alang sa mga hataas nga opisyal sa gobyerno sama sa Presidente.
Sumala pa sa kanhi pangulo, kon bulatlaton ang unod sa batakang balaod, dili mamahimong magbutang og bisan unsang restrictions ug extensions gawas na lamang kon ipaagi kini sa consitutional assembly.
Hugot sab nga gibarugan niini nga walay angayng ilisan sa atong konstitusyon, ug dili sab mao ang saktong panahon aron amyendahan kini alang lamang sa interes sa mga naglingkod nga opisyales sa gobyerno.
Dugang pa ni Digong, dili mamahimong makabenepisyo ang mga pulitiko gikan sa pag-amyendar sa konstitusyon nga magtukmod pa nga gamiton ang pundo sa nasud alang sa pagpangandidato sa eleksyon.
Subling gipanghimakak ni Former President Duterte ang mga alegasyon mahitungod sa pagdawat niya og mga binultong armas gikan kang Pastor Apollo Quibuloy.
Sumala pa sa kanhi pangulo, nagbaton na kini og daghanang koleksyon sa mga pusil isip gun collector.
Mahitungod sab sa gikaatubang nga subpoena sa pastor, dunay kabubut-on si Quibuloy aron mutuman sa gipasakang mando sa Senado aron mutambong sa nagpadayon niining Senate hearing sa mga kaso nga giatubang niini sa Amerika.
Atol sab sa nahitabong press briefing ni kanhi Pangulong Duterte, gibutyag sa kanhi pangulo nga daan nang nahimong kabus ang Mindanao sa pagdawat og nasyonal nga pundo, rason nga naggula og mga panawagan nga ihibulag na ang Mindanao sa kinatibuk-ang Pilipinas nga gikapalag sab sa daghanang mga kongresista.
Sumala pa ni Duterte, alang matod pa sa kauswagan sa isla ang maong laraw nga Mindanao independence, apan kon maghatag lamang kini og kakulian sa tibuok nasud, dili na lamang ipugos ang pagbulag sa Mindanao sa Pilipinas.
Awhag pa ni Duterte nga ihunong ang pagbulag-bulag ug pagdapig-dapig sa mga etniko sa nasud ug mas maayong sundon ang kinatibuk-ang mga balaod ingon man makipag-alayon sa mga batakang programa alang sa kahusay ug kalinaw sa mga Pilipino.
Kahinumduman nga 57 ka mga magbabalaod sa Mindanao ang hugtanong mipirma og manifesto alang sa dili pag-uyon sa laraw ni kanhi Pangulong Duterte alang sa separate Mindanao Republic nga unang gipanawagan nila Duterte ug Davao del Norte 1st District Representative Pantaleon Alvarez.
via || Bombo LJF
