DAVAO CITY – Doble karon ang pagpaningkamut sa otoridad ug istrikto nga gipatuman ang foot bath sa Calinan district ning dakbayan human nga natala sa lugar ang unang kaso sa African Swine Fever (ASF).
Nasayran nga gipahimutang karon ang animal quarantine checkpoint sa Crossing sa Purok 7 Brgy. Lacson, Calinan kini aron masiguro nga dili gayud makagawas ang mga hayop nga gikan sa lugar ingon man walay mga livestock usab ang makasulod sa nahisgutan nga dapit nga posibleng maoy hinungdan nga mokatag ang nahisgutan nga sakit sa mga baboy.
Dili na sab basta-basta nga makalusot ang mga biyahedor sa lugar gumikan kay kinahanglan nila nga mo-agi sa foot bath ug adunay ipahigayon nga pag-spray sa mga sakyanan.
Samtang daghanang mga residente sa Calinan ang mawad-an ug panginabuhian kung isugyot na ngadto kanila nga pamatyon ang ilang mga binuhing hayop.
Nasayran nga kadaghanan sa mga lumulupyo sa lugar adunay kaugalingon nga binuhing baboy sa ilang tugkaran.
