DAVAO CITY- Gibarugan ni Ben Sagulili, acting OIC sa Bankerohan Livestock Multipurpose Cooperative, nga hugot nga ginadili gayud ang flooding sa mga hayop ilabi na sa mga baka ug kabaw ayha ihawon.
Subay niini, ila gayud nga ginasiguro nga ayha ihawon ang baka o kabaw, gina-check una kini sa mga veterinarian nga gi-deploy sa nahisgutang slaughter house ilalom sa National Meat Inspection Service (NMIS) aron masayran kung gikan ba gi-tingal o gi-flooding ang mga hayop.
Apan gibutyag ni Sagulili nga kaniadtong dili pa siya ang OIC sa maong slaughterhouse, aduna gayud makalusot nga mga hayop nga gikan gi-flooding.
Apan karon, mas gipahugtan pa sa maong buhatan ang pagbantay pinaagi sa pagbutang og dugang personahe nga maoy musuta sa lawas sa hayop nga ihawonon.
Gibutyag sa nahisgutan nga aduna silay usa ka kustomer sa una nga naga-flooding ug dako gayud kaayo kini nga problema ngadto kanila tungod ang mga vendors gikan sa Agdao Public Market, Bankerohan o bisan asa pa man nga maabot ang ilang karne nga giihaw, daghan gayud sila’g madawat nga mga tawag ug text diin kasagaran gayud niini nagareklamo mahitungod sa texture sa karne.
