DAVAO CITY – Laraw karun sa lokal nga kagamhanan nga subling ipatuman ang face to face nga pagsaulog sa usa sa mga dagkung aktibidad sa dakbayan nga Kadayawan sa Dabaw human nga mas lu-ag na karon ang mga restrictions.
Sumala pa kang City Tourism Operations Office (CTOO) head Generose Tecson, sa kasamtangan wala pa nahisgutan ang maong butang tali sa mga organizers apan posibleng paubsan lamang ang aktibidad ngadto sa usa ka semana.
Kaniadtong 2019, gipalapdan sa lokal nga kagamhanan ang Kadayawan celebration sulod sa usa ka bulan.
Pipila sa mga highlight events mao ang pagbalik sa Indak-Indak sa Kadalanan, Pitik Kadayawan, ug Pamulak sa Kadayawan.
Plano sab nga subling ablihan ang Tribal Village sa Magsaysay Park ngadto sa publiko.
Sa kasamtangan, gihulat na lamang sa mga organizers ang executive order isip pagpangandam sa ilang preperasyon nalang sa tinuig nga kasaulogan.
Kahinumduman nga usa ang Kadayawan, sa tinuig nga kapiyestahan sa siyudad sukad 1986 apan gihimo kini nga virtual celebration kaniadtong 2020 ug 2021 tungod sa nagpadayon nga Covid-19 pandemic.
Gani usa sab sa naapektohan ang Araw ng Dabaw, hinungdan nga gihimo sab nga digital ang pagsaulog niini o pinaagi sa online.
Usa sab sa mga plano nga ibalik karun dinhi sa siyudad mao ang meetings, incentives, conferences, ug exhibitions events ilabi na kung magpabilin ang siyudad sa alert level 1 gumikan sa nagpadayon nga pag-ubos sa kaso sa Covid-19 ug ang nagkataas nga ihap sa mga indibidwal nga nabakunahan.
