DAVAO CITY – Manukad na sa ilang expropriation o ang katungod sa pagkuha ug mga pribadong luna alang sa pampubliko nga panggamitan sa pipila ka mga establisyemento sa IGACOS ug Davao City ang Department of Public Works and Highways kon DPWH alang sa gipasiugdang Samal Island – Davao Connector Project.
Gikanayon ni Samal City Mayor Al David Uy nga nahatag na ang mga rekisitos nga gikinahanglan ug matud pa, maglihok ang Solicitor General alang niini.
Kasamtangang ginaistoryahan sa buhatan ang maong expropriation sa mga luna sa duha ka lungsod nga posibleng maigo sa proyekto sukad pa niadtong tuig 2020.
Samtang gipaniguro ni DPWH Secretary Manuel Bonoan nga gipangandaman ug ginatun-an ang maong tulay sa kagamhanan, ug matud pa gihatagan kini ug konsiderasyon sa Department of the Environmental and Natural Resources kon DENR.
Sa pikas bahin, gipasalamatan sa mayor ang katumanan sa maong proyekto atol sa nahitabong groundbreaking ceremony niadtong Huwebes diin pormal nang gilubong ang timecapsule ni Pangulong Bongbong Marcos.
Dugang pa sa mayor na taliwala sa mga miangal sa maong proyekto tungod sa mga pangkinaiyahang mga bahad niini, miagi kini ug legal nga proseso ilawom sa DENR.
Aduna hinuo’y katungod ang mga mukontra nga magpadayag sa ilahang mga opinyon apan dili kini makababag sa pagpanukad ug buhat sa maong tulay.
via || Bombo LJ Florendo
