Gipahayag ni kanhi Senator Leila de Lima nga si kanhi Pangulong Rodrigo Duterte ang mastermind sa extrajudicial killings (EJKs) sa nasud.
Gipagawas ang maong pahayag sa kanhi Senador sa gihimong imbestigasyon sa House Committee on Human Rights nga adunay kalabutan sa drug related EJK sa nakalabayng administrasyon.
Gipahayag pa niini gipatuman ang drug war isip usa ka official Duterte program of government sa dihang nangatungdanan kini isip Presidente.
Si De Lima nga kritiko kang Duterte ang nabilanggo ug pipila katuig ang gipakawad-an ug kasal-anan gumikan sa pasangil nga nalambigit kini sa illegal drugs.
Sa opening statement niini sa nahisgutang pagdungog, gikanayon ni de Lima nga ang drug war sa Duterte administration ang gipatuman ubos sa Oplan Double Barrel sa Philippine National Police (PNP).
Dugang pa ni de Lima, ang drug war ni Duterte ang nagsugod sa dihang mayor kini sa dakbayan sa Davao ubos sa gimugnang Davao Death Squad (DDS).
Ang mihimo kuno sa pagpamatay mao ang mga assassination squads nga gilangkuban sa mga aktibong pulis ug civilian hitmen.
Matod pa usab sa kanhi Senador nga importante ang testimonya sa duha ka DDS member nga sila si Edgar Matobato ug Arturo Lascañas ug matod pa niini nga niadtong 2016, gusto niining mapresenta si Matobato sa Senado ug kini usab ang hinungdan kung natanggal kini isip chairman sa Senate Committee on Justice and Human Rights.
Si Lascañas ang testigo na sa International Criminal Court’s (ICC) investigation nga adunay kalabutan sa EJK.
Gikanayon pa niini nga importante ang ICC investigation partikular na ang Office of the Prosecutor (OTP).
