Gihagit sa usa ka grupo ang Department of Justice (DOJ) nga patubagon si kanhi Pangulong Rodrigo Duterte gumikan sa wala pagtabang sa mga awtoridad aron madakpan si Pastor Apollo Quiboloy.
Gipahayag ni Bayan Muna chairperson Neri Colmenares nga isip usa ka abogado ug former chief executive, angay masayod si Duterte nga gikinahanglang mag-cooperate kini sa mga awtoridad sa pagpatuman sa warrant batok kang Quiiboloy nga gipahamtangan ug human trafficking ug child abuse.
Gipadayag kini ni Colmenares gumikan sa nahimong pamahayag sa kanhi Pangulo nga nasayod kini kung asa nagtago si Quiboloy apan nagdumili kini sa pagbutyag sa lugar. Dugang gipahayag pa niini nga mao kini ang problema kang Duterte gumikan kay sa dihang nahimo kining Presidente, gibatikos niini ang tanan nga wala miuyon kaniya apan giprotektahan ang mga higala bisan paman nga sad-an sa balaod.
Mamahimong manubag kuno ang kanhi Pangulo ubos sa Canon III Section 2 sa Code of Professional Responsibility and Accountability (CPRA) kung diin nakabutang nga gikinahanglang ipatigbabaw sa usa ka abogado ang balaod ug mutabang sa paspas nga pagpatuman sa hustisya.
Nanawagan usab ang opisyal sa Bayan Muna ug makuting imbestigasyon kung nganong dili makita sa kapulisan si Quiboloy ug nanawagan sa ubang ahensya sa gobyerno nga mutabang sa pagpangita sa lider Kingdom of Jesus Christ (KOJC).
