DAVAO CITY – Gipahingusgan ni Davao City First District Councilor Tek Ocampo ang pagpalawig sa implementasyon sa mga enviromental laws sa mga barangay sa dakbayan.
Gumikan kana sa nasayrang nagkatag nga toxic waste sa mga barangay sa Mudiang ug Indangan ning dakbayan.
Kahinumdumang niadtong Agosto sa nakalabayng tuig, gireklamo ang usa ka kumpanya nga nagtambak og toxic waste sa mga nahisgutang barangay.
Sumala sa resulta sa imbestigasyon sa DENR-Environment Management Bureau nga ang maong hugaw, dunay sagol nga uling ug 20% edible oil nga gikonsiderang delikado.
Gikaperwisyo sab sa mga residente ang baho sa maong hugaw.
Gipapamulta na ang kumpanya nga responsable niini ilawom sa Presidential Decree No. 1586, lakip na ang Republic Act 6969 kon Toxic Substances and Hazardous and Nuclear Wastes Control of 1990, ug Republic Act 9275 kon Philippine Clean Water Act of 2004.
Nanawagan karon ang DENR ngadto sa mga kumpanya ug industriya nga mamahimong responsable sa paglabay sa mga hugaw aron nakunhuran ang perwisyong hatid niini sa mga konumidad.
via || Bombo LJF
