DAVAO CITY- Gipangdala sa ospital ang drayber ug pahinante sa Elf truck human nga nakangkon ug mgab bung-og ug samad sa kalawasan human sa nahitabong disgrasya kagabii sa national highway sa Tibungco ning dakbayan sa Davao.
Sa report gikan sa kapulisan, nahitabo ang insidente pasado alas dyes kagabii nga miresulta sa pagka-angol sa mga biktima ug pagka-danyos sa ilahang sakyanan.
Ang mga nalambigit nga mga sakyanan ang gilangkuban sa usa ka Elf Truck ug usa ka Prime Mover nga gimaneho sa usa ka John Ross Mecarte Pino, 41-anyos.
Sa imbistigasyon sa mga otoridad, nahitabo kini atubangan sa Sumifru gate exit sa Brgy. Tibungco ning dakbayan sa Davao.
Sumala pa sa mga nakakita sa maong panghitabo, ang Elf truck naglawig sa Daang Maharlika Highway nga nagsubay sa 2nd lane, samtang ang prime mover niadtong tungura pagawas kini gikan sa sulod sa Sumifru padulong sa national highway, sa dihang miliko pawala ang prime mover didto na kini nabanggaan sa elf truck nga maoy hinungdan sa pagkaguba sa sakyanan ug pagkaangol sa mga sakay niini.
Sumala pa sa mga nakakita ,wala nabantayan sa drayber sa Elf ang pagsignal pawala sa prime mover hinungdan nga nabangga kini sa ulo nga bahin sa truck.
Sa karon padayon pa nga ginaila sa otoridad ang drayber sa Elf ingon man ang helper niini nga anaa sa Southern Philippine Medical Center.
Samtang ang Elf truck ginasubay sab karon kung kinsa ang nakarehistro nga tag-iya niini nga adunay plate no. nga AAS 5031.
