DAVAO CITY – Nagtuo si Davao City Chamber of Commerce and Industry Inc. (DCCCII) outgoing executive vice president John Carlo B. Tria nga mas mulambo pa ang ekonomiya sa dakbayan pagsulod ning bag-ong tuig luyo sa nagkadaiyang hagit nga nasinatian sa milabay nga 2019.
Sumala pa kang Tria nga magsilbi na sab isip president sa DCCCII, nga daghanang mga investors ang nagpakita og interes nga mobubo og puhunan sa dakbayan hinungdan nga lauman sumala pa ang pagsaka sa ihap sa mga negosyo nga itukod dinhi sa dakbayan.
Hinuon daghanan sumala pang hagit ang gi-atubang sa dakbayan sa 2019 nga mihatud og dyutay nga epekto sa negosyo sama na lamang ang sunod-sunod nga linog diin usa sumala pa sa mga naapektohan ang mga real estate ilabi na ang mga high-rise residential properties nga mikunhod ang sales lakip na ang food businesses tungod sa gipatuman nga temporaryong pagpanira human ang kusog nga linog.
Samtang gibutyag sab ni Davao City Tourism Operations Office head Generose Tecson, lauman sumala pa nga mas daghanan ang mobubo og negosyo sa tourism industry sama sa resorts, convention facilities ug international connectivity.
Mas daghanan sumala pang mga negosyante ang magbaton ug dakong pagsalig sa siyudad kini tungod sa ipahigayon nga Mice (meetings, incentives, conferences/conventions, exhibitions/events) Conference 2020 dinhi sa siyudad.
