DAVAO CITY – Padayon ang panawagan sa mga kasundalohan ngadto sa mga mikandidato sa May 2019 midterm election nga dili magpadala sa permit to win, permit to campaign sa New People’s Army (NPA).
Hinuon gibutyag ni Lt. Col Ezra Balagtey, tigpamaba sa Eastern Mindanao Command, nga sa kasamtangan wala pa silay namonitor nga mga kalihokan sa NPA nga nangapayo kini ug salapi sa mga kandidato aron nga makapangampanya ang mga nahisgutan nga sa lugar nga adunay presensiya sa mga rebelde.
Gibarugan sa opisyal nga wala gitugutan ang susama nga lakang ug mamahimong mag-atubang ug reklamo ang mga kandidato nga mohatag ug salapi sa mga NPA.
Gani nagbahad sumala pa si Sec. Eduardo Año nga dili sila magpanuko nga moduso ug reklamo sa higayon nga aduna silay mahipus nga impormasyon nga adunay mga kandidato nga malambigit sa susama nga binuhatan.
