DAVAO CITY- Gihimakak sa Eastern Mindanao Command kon EastMinCom ang matud pa gituuhang presensya sa US Troops ug mga drone operations duol Davao City Airport nga gikanayon sa usa ka political commentator.
Sumala pa ni EastMinCom Spokesperson Colonel Ma. Cristina Rosete-Manuel nga walay namonitoran ang opisina sa Assitant Chief of Unified Command Staff for Operations kon ug Assistant Chief of Unified Command Staff for Intelligence kalabot sa maong aktibidad.
Kini human miluwat og pamahayag ang usa ka political commentator nga si EB Jugalbot nga naalarma kini sa matud pa pagdagsa sa mga sundalong Amerikano sa syudad nga posibleng makasupak sa soberanya sa Pilipinas.
Gituuhan niini nga ang matud pa pagdaghan sa presensya sa mga langyaw nga sundalo ang adunay kalabutan sa umaabot nga International Criminal Court warrant batok kay Vice President Sara Duterte ug ang pag-aresto kay Pastor Apollo Quiboloy nga naga-atubang karon og kaso sa Estados Unidos.
Dugang pa niini nga ang matang sa mga drone nga gigamit sa kahanginan sa Davao City mao ang MQ-9 Reaper drones, diin highly classified kini ug kasagarang ginapalupad sa mga trained nga mga personahe.
Gituuhan usab niini nga adunay tago nga operasyon ang sundalo sa Estados Unidos dinhi sa syudad sa Davao.
via/ DMA
