DAVAO CITY – Malampusong gipadala ang nasa 28 tonelada nga fresh durian gikan Davao City paingon sa China kagahapon.
Gilangkuban ang maong kargamento sa Puyat variety sa durian nga in-demand karon sa maong nasud gawas sa lain pang variety sama sa D101 ug Duyaya.
Nahitabo ang inagurasyon sa pag-export sa maong prutas padulong sa laing nasud gumikan sa kasabutan tali Pilipinas ug China nga protocol alang sa phytosanitary requirements sa pag-export sa durian atol sa pagbisita ni Pangulong Ferdinand Marcos Jr. sa China kaniadtong Enero.
Gilauman sa pangulo sa Durian Industry Association of Davao City nga si Emmanuel Belvis, nga makabenepisyo niini ang mga mag-uuma sa durian dinhi sa dakbayan ug lakip na sa Mindanao tungod aduna nay bag-ong merkado nga buot mupalit sa ilang produkto.
Siguruhon sab sa matag mag-uuma ang Good Agricultural Practice certfication aron maka-export sila og durian sa laing nasud.
Gilaumang makuha sa Pilipinas ang P8.2M nga income gikan sa initial export sa durian sa China.
via || Bombo LJF
