DAVAO CITY- Gibutyag sa Davao Light and Power Company nga sa kinatibuk-an nga residential rate adunay pagsaka ngadto sa P2.96 per kilowatt hour (kWh) ning bulan sa Hulyo.
Tungod niini, mahimo na nga P10.89/kWh karon gikan sa P7.93/kWh niadtong nakalabay nga bulan.
Kini nagpasabot nga kung ang imung konsumo sa usa ka bulan moabot sa 100KWH aduna kay pagabayran nga dugang P292 pesos.
Gipasabot karon sa kompanya nga ang pagsaka sa kuryente mao ang gipatuman niini nga ikaduhang installment pinaagi sa staggered nga billing niadtong Mayo sa Wholesale Electricity Spot Market nga nakadugang sa pagsaka sa singil sa kuryente.
Kahinumduman nga niadtong bulan sa Hunyo, gimandato sa Energy Regulatory Commission (ERC) ang tanang kompanya ug kooperatiba sa pagkolekta sa generation charges gikan sa May billing sa Wholesale Electricity Spot Market pinaagi sa tagi-tagi nga pagbayad nga gibahin sa bulan sa Hunyo hangtod sa Septyembre ning kasamtangan nga tuig.
Samtang nag-awhag karon ang DLPC sa konsumante sa saktong paggamit sa kuryente ug dili usikan ang paggamit niini aron nga dili makaangkon ug taas nga bayrunon.
Samtang sa laing bahin, kasamtangan karon nga adunay Emergency Power Interruption sa pipila ka bahin sa CENRO, NHA Maa ug kasikbit nga mga lugar nga nagsugod kaganihang ala-una sa hapon hangtod sa alas sais karong gabii.
Ang hinungdan sumala pa sa pagkawala sa kuryente mao ang gipahigayon nga line maintenance sa nasampit nga dapit.
Nangayo karon ug pagsabot sa mga konsumante ang kompanya sa kahasol nga hatod tungod sa emergency power interruption.
Alayon niini nagpahimangno karon ang DLPC sa publiko sa pagbinantayon sa pag-agi sa nasampit nga lugar nga nagapahigayon ug pag-repair pinaagi sa pagsunod sa warning signs, ilabi na sa mga lugar nga adunay gigamit nga mga heavy equipment.
