DAVAO CITY- Mokabat sa P180,000 pesos ang danyos sa sunog nga nahitabo sa Purok 8, Ramon Magsaysay Street, Calinan Poblacion, Calinan District, ning dakbayan sa Davao pasado alas singko ang takna kagahapon sa hapon.
Subay sa report sa mga otoridad, nagsugod ang sunog sa panimalay ni NOVEMAR SALUCOP nga residente sa Barangay Malagos, Bagiuo District nga kini gama sa mga kahoy.
Subay sa imbistigasyon, nasuta ni FO3 Jasper Cambronero, Fire Investigator sa Calinan Fire Station, nga ang hinungdan sa sunog mao ang short circuit tungod sa gipasagdan nga electrical appliances.
Wala hinuon gitumbok sa otoridad kung unsa nga matang sa appliances ang napasagdan.
Milungtad pa ug pipila minutos ayha nadeklara nga fire-out ang nahitabong sunog. Atol sa maong panghitabo, walay natala nga naangol sa bahin sa sibilyan ug sa bahin usab sa fire rescuer.
