DAVAO REGION- Gipresenta kaganihang buntag sa NBI-11 ang dul-an 60 ka mga giingong POGO workers human nga gidakop sa Panabo City gumikan sa iligal nga POGO operation.
Subay sa gipahigayon nga press conference, sa kainatibuk-an adunay 55 ka mga Chinese Nationals sa 59 nga ihap samtang adunay duha ka Malayians ug usa ka Pilipina.
Nasayran nga nag-operate sumala pa ang mga nahisgutan sa Malitbog, Brgy. Manay, Panabo City nga gituohan sa otoridad nga adunay nagpaluyo nga mga opisyal sa ilahang iligal nga binuhatan.
Sa nahimong pamahayag ni NBI-Semro spokesperson Agent Ely Leaño nga kapin tulo ka bulan sumala pa nga nag-operate ang mga nahisgutang dinakpan ilawom sa Jinsheng International POGO hub.
Samtang gipahigayon sab ang tulo ka adlaw nga surveillance sa nasampit nga lugar ayha nga gipahigayon ang pagronda kaganihang pasado alas Dos sa kaadlawon.
Nasayran nga sa ka agricultural warehouse kaniadto ang nasampit nga gambalay.
Sa gihimong pamahayag sa NBI, adunay usa ka trabahante sa POGO ang nakahatag kanila ug impormasyon kabahin sa iligal nga aktibidad.
Atol sa gihimong pagpresenta sa NBI sa ilahang buhatan, makita ang mga nagkadaiyang android nga cellphone, mga passport, posas, kaha sa sigarilyo, mga ID ug labaw sa tanan adunay nakumpiska nga duha ka shot gun.
Sa karon nagpadayon ang gihimong imbistigasyon sa taga NBI kabahin sa nasampit nga operasyon.
