DAVAO CITY- Moabot sa dul-an 300 ka mga atleta ug coaches ning dakbayan ang gitagaan og pasidungog sa Gabi ng Parangal at Pasasalamat 2024, kaniadtong nakalabayng adlaw.
Sa pagpanguna sa lokal nga panggamhanan pinaagi sa City Sports Development Division, gitagaan niini og pasidungog ang 287 ka mga athletes ug coaches nga dabawenyo pinaagi sa paghatag og mga medalya, cash incentives, ug plaques of recognition.
Sumala pa ni City Sports Development Division Head, Michael Denton Aportadera, nga gihimo ang maong aktibidad aron sa pag-ila sa mga nahimo nga kadaogan sa mga nahisgutan sa nagkadaiyang sports competition, susama na lamang sa Batang Pinoy, Philippine National Games, ug mga International Competitions kaniadtong nakalabay nga tuig, 2023.
Dugang pa niini nga ang mga nahimo sa mga atleta ug coaches, nakahatag ug dungog sa dakbayan, ug nakapasigarbo sa tanang Dabawenyo.
Samtang, nagpaabot sab og mensahe si Mayor Baste Duterte atol sa maong aktibidad ug ipaambit niini ang iyang paglaom nga magpadayon pa ang pagsilbing maayong ehemplo sa mga nahisgutan alang sa mosunod pa nga henerasyon.
Samtang, giawhag usab ni Aportadera ang mga atleta nga ipadayon ang ilang nahimo sa sports uban ang pahinumdom nga dili gayud mawad-an og disiplina.
