DAVAO CITY – Moabot sa 160 ka mga residente ang nahatagan ug anti-COVID-19 vaccine ug nakadawat ug bugas sa Barangay Tamugan, Marilog District atol sa special mobile vaccination nga gipahigayon sa Vaccination Cluster sa Davao City COVID-19 Task Force sa nahisgutang dapit.
Gikanayon ni Dr. Michelle Schlosser, spokesperson sa Davao City COVID-19 Task Force, gipahigayon nila ang mobile vaccination sa pagpanguna ni City Health Office (CHO) Technical Division Chief Dr. Julinda Acosta ug Vaccination Cluster Head Dr. Joy Villafuerte sa Barangay Tamugan uban ang partner sa syudad nga mao ang United States Agency for International Development (USAID).
Gipaslaamatan niini si Tamugan Barangay Chairman Diomedes dela Cruz, Barangay Councilor Edwin Kawaling, mga barangay health workers, ug ang mga uban pang mga barangay officials gumikan sa suporta niini aron magmalampuson ang mobile vaccination.
Gikanayon sa city health official nga gilauman nila nga gamay lamang sa mga residente ang moadto sa Tamugan Barangay Hall aron magpabakuna gumikan kay kadaghanan sa mga balay dinhi naa sa lagyo nga distansiya.
Giatiman tanan sa mobile vaccination ang tanang age group sa TAmugan lakip na kadtong mga nag-edad ug 11, 12 hangtud 17 anyos ug ang mga 18 anyos pataas alang sa primary, missed, o booster doses.
Gipahigayon usab ang medical checkup ngadto s amga residente isip kabahin sa mobile vaccination program uban sa USAID.
Tanan nga mga nagpabaluna ang nakadawat ug tag-usa ka kilo sa bugas isip insentihbo gikan sa lokal nga kagamhanan.
