DAVAO CITY – Nakalas ang kinabuhi sa tulo ka mga tawo nga nalambigit sa usa ka aksidente nga nahitabo kagahapon sa kaadlawon sa may Licanan, Barangay Lasang, Davao City.
Giila sa Bunawan Police ang mga biktima nga sila Ernesto Bernardez, 41 anyos, taga-Purok 7, Bangkas, Heights Toril, ning dakbayan; ug lain pang duha ka sakay nga sila Randy Calibay, 38 anyos nga taga-Malita, Davao Occidental; ug Mark Anthony Bernardez, 26 anyos, nagpuyo sa Fatima, General Santos City.
Subay sa report, sakay ang tulo ka mga biktima sa usa ka Bonggo type nga trak nga gimaneho mismo ni Bernardez.
Paingon sa norte nga bahin sa national highway ang maong Bonggo truck sa dihang nasugatan sila sa prime mover truck nga gimaneho ni Irenio Espantalion Gealon, 50 anyos, nagpuyo sa Purok 9, Jocel, New Visayas, Panabo City, Davao del Norte.
Miguwa sa imbistigasyon nga miliko ang prime mover truck nga pasulod sa ilahang garahe sa pa-too nga direksyon sa inner lane, apan wa nabantayan sa nagsunod nga bongo type truck ug mibangga kini.
Nalumping ang unahan nga bahin sa Bonggo truck nga naigo sa tumoy nga bahin sa dagkong truck.
Nakahiagom og samad ug bun-og sa lawas ang tulo ka mga biktima apan bisan pa sa pagtabang kanila sa mga rescuers sa Central 911, wala na nadugtungan ang ilang mga kinabuhi gumikan sa kusog nga impak sa ilang pagkadisgrasya.
Gikustodiya na sa Bunawan Police Station ang driver sa truck lakip ang mga sakyanan alang sa tukmang disposasyon.
via || Bombo LJF
