DAVAO REGION- Patay ang duha ka mga sakay sa duha ka mga sakyanan human nga nagkabangga kini pasado alas otso ang takna kagabii.
Subay sa report sa otoridad, nahitabo ang disgrasya sa Purok 10, Barangay Buda, Marilog District, ning syudad sa Davao.
Sa gihimong imbistigasyon sa traffic section sa Marilog PNP, nalambit sa maong panghitabo ang usa ka Ford Ranger pick-up nga gimaneho sa usa ka Kerwin, hamtong ang pangidaron.
Samtang usa ka Fuso Canter drop-side truck nga gimaneho ni Rey Bando Awe, 40-anyos minyu nga residente sa Purok 18 Duplex, Brgy Talomo Proper ning dakbayan sa Davao.
Sumala pa sa otoridad, ang duha ka mga sakyanan ang nagsubay sa Davao-Bukidnon Road sa managlahing direksyon, giin ang pick-up ang gikan sa Bukidnon ug padulong sa sentro sa dakbayan sa Davao, samtang ang drop side truck ang gikan sa dakbayan sa Davao ug padulong sa Bukidnon.
Sumala pa sa drayber sa truck nga pag-abot sa gikonsidera nga accident-prone area sa Purok 10, Barangay Buda, kalit sumala pa nga nawad-an ug brake sakyanan nga hinungdan nga nawad-an kini ug control.
Gumikan sa nahitabo, nipadulong ang truck sa pikas nga dalan nga gisubay usab sa pick-up nga maoy hinungdan sa head-on collision.
Tungod sa kakusog sa bangga nalabay ang mga sakyanan sa karsada ug ang mga sakay niini nanga-angol. Nasayran nga sakay sa Pick-up si Alag Kristopher Dasalla, hamtong ang pangidaron nga residente sa Blk 9 Micah St., Bago Aplaya, ning syudad sa Davao nga gidala pa sa ospital apan gideklara kining dead on arrival, samtang ang kauban niini nga si Lerry Dela Cruz, ang nagpaalim sa ospital.
Samtang sa bahin sa truck, sakay sila Jessy Abando, Ruel Awe, Elmer Siputan ug Ruel Aktiva nga mga hamtong ang panuigon nga nakaangkon sab ug bun-og sa kalawasan tungod sa nahitabo ug gidala sa Isaac Robillo Hospital.
Apan si Ruel Aktiva ang gideklara nga dead on arrival sa doctor.
Sa pagkakaron ang drayber sa nga si Rey Bando Awe, ang gikustudiya sa kapulisan ingon ang nadanyos nga mga sakyanan.
