DAVAO CITY – Nakabsan sa kinabuhi ang duha ka suspek sa pagpamusil sa negosyante ug trabahante sa Paseo De Romano, Feeder Road 2, Brgy. Tibal-og, Santo Tomas, Davao del Norte niadtong Sabado sa gabii.
Giila ang mga napatay nga suspek nga sila Joefry Delerio Sr., taga-Purok 3, Carmen; ug Fredo Estrada alyas “Ungas”, taga- Panyong Area, Feeder Road 2, Brgy Tibal-og, Sto. Tomas, Davao del Norte.
Sumala sa report sa Santo Tomas Municipal Police, gipusil sa mga suspek ang mga biktimang sila Pablito Quino Sr, usa ka negosyante nga nagpuyo sa Tagum City; ug Benedicto Josol Leghidan, 29 anyos ug usa ka laborer nga taga- Menzi, Brgy. Tibal-og, Santo Tomas, Davao del Norte.
Gisulayan sa mga kapulisan ug sikop ang mga suspek, sa dihang nagpabuto ang usa sa mga suspek nga gikasamdan ni Police Corporal Alvin John Almendras sa abaga ug tuo nga paa.
Nakahimo pa sa pagbalos ang maong pulis hangtud napatay ang dinakpang si Delerio. Napusilan sab ang laing suspek nga si alyas “Ungas” hinugdan sa iyang hinaling kamatayon.
Gidala na sa Davao Regional Medical Center ang nasamdan nga pulis aron magpaalim. Samtang landig sa balay-tambalanan sa Carmen District Hospital ang biktimang si Leghidan nga kasamtangang nagpaayo.
Nasayran nga nalambigit sa carnapping case si Delerio Sr. nga myembro sab sa Criminal Gang sa probinsya.
Nagpahigayon na ug halawom nga imbestigasyon ang kapulisan sa tinoud nga motibo sa maong pagpamusil ngadto sa mga biktima.
via || Bombo LJ Florendo
