Ugdaw ang upat ka mga panimalay samtang nadamay ang usa ka sakyanan atol sa nahitabong sunog sa Luisa St. Juna Subdivision, Ecoland ning dakbayan sa Davao. Subay sa inisyal nga report gikan sa mga otoridad, nahitabo ang sunog pasado alas Siyete kaganihang buntag. Sumala pa sa mga otoridad nga gumikan sagad sa mga panimalay ang gama sa light materials paspas nga mikyunap ang kalayo sa kasikbit nga mga panimalay. Sa inisyal nga imbistigasyon, nagsugod sa lawak ang sunog sa usa ka working student nga anaa sa palengke niadtong tungura. Atol usab sa maong panghitabo, nadamay pa ang sakyanan nga nakaparking daplin sa karsada.
Gidudahan nga nakalimtan nga cellphone nga nakasaksak ang hinungdan sa pag-ulbo sa kalayo. Sa pagkakaron nagpadayon pa ang gihimong imbistigasyon atol sa maong panghitabo nga maayo na lamang walay natalang naangol.
Samtang pasado alas Otso usab kaganihang buntag usa ka sunog ang miulbo sa Purok 2-A, Brgy. La Filipina, Tagum City diin usa ka boarding house ang naugdaw. Sumala pa sa mga otoridad nga posibling kuryente ang hinungdan sa pagdilaab sa kalayo nga nagsugod sa kwarto sa usa sa mga boarders nga walay tawo gumikan anaa kini sa ospital. Mokabat sa napulo ka mga pamilya ang apektado sa nasampit nga sunog nga karon padayon pa usab nga gina-assist sa mga otoridad.
