DAVAO CITY – Gilamoy og dakong kalayo ang gibana-banaang 46 ka mga panimalay pasado ala una sa hapon kagahapon sa Muslim Village, Times Beach, Barangay 76-A ning dakbayan.
Sumala pa, ang tinubdan matud pa sa maong kalayo mao ang pagluto sa usa ka mentally challenged gamit ang butane,apan sa wala damhang higayon, kalit lamang mibusikad ang butane.
Sumala sab nga paspas nga mikuyanap ang maong kalayo gumikan gama sa light materials ang mga panimalay ug matud pa nagtapad-tapad usab ang mga panimalay hinungdan nga daghan ang nangadamay.
Subay sa datos gikan sa barangay, anaa sa 46 ka panimalay ang naugdaw sa sunog diin 23 ang totally damaged ug 23 sab ang partially damaged.
Gibanabanaang anaa sa P1.7 miliion ang damyos sa maong sunog nga nakaapekto sa 46 ka mga pamilya kon 70 ka mga indibidwal.
Samtang bandang alas-5:45 sa hapon kagahapon dihang laing sunog ang miulbo sa may Purok 4, Brgy. 76-A, Bucana, Davao City.
Nagkalisod una ang mga kabumberohan sa pag-penetrate sa maong area gumikan sa gagmay nga dalan ug nakabalandrang sakyanan.
Gipanubayan pa sa BFP 11 ang natalang damyos sa nahitabong sunog.
