DAVAO CITY – Nasantop sa duguong kamatayon sa duha ka mga sakop sa Calinan Police ang pagresponde sa usa ka “pangayaw” nga nahitabo sa Purok 4, Brgy. Lacson, Calinan, Davao City, bandang alas-4 sa hapon, adlawng Miyerkules, Hulyo 25.
Giila ang nakabsan mga biktima nga sila Corporal Mark Anthony Corsino ug Staff Master Sergeant Tito Lague.
Samtang anaa sa kritikal nga kahimtang ang drayber sa mobile patrol nga si Donald Ombrete nga kasamtangang nagpaalim sa balay-tambalanan.
Samtang usa ka Corporal Ken Leo Gumanoy ang nakalingkawas ug kasamtangang nagpaalim sab sa balay tambalanan.
Subay sa inisyal nga imbestigasyon sa Davao City Police Office, usa ka komosyon ang nahitabo sa maong lugar dihang girespondehan kini sa mga pulis sa Calinan.
Nasayran nga niresponde ang mga pulis human mitawag ang Barangay Kapitan mahitungod sa nahitabong pangayaw sa nahisgutang lugar.
Sumala pa sa mga nakasaksi nga pag-abot sa lugar, giistoryahan lamang nila ang mga suspek apan kalit lamang silang gipanigbas-patay, giilog ang armas nga M16 ug gipabuthan sa ulo ang pulis.
Nasayran sab nga napatay sa nirespondeng mga pulis ang usa sa mga suspek nga giilang si Benao Maanib Landas, 29 anyos, usa ka tribal leader ug resident sa Kalayaan, Sitio Pangyan, Barangay Tamugan, Marilog; samtang dakpan ang lain pang suspek nga si Rico Masacay, 25, ulitawo, contruction worker, ug nagpuyo sa Sitio Malikongkong, Brgy. Gumitan, Marilog.
Naglusad na og imbestigasyon lakip na hot pursuit operation ang Calinan Police Station sa duguong insidente.
Gikordon na sab sa Calinan Police ang maong lugar alang sa seguridad human nga nakasinati og ilabihang trauma ang mga residente.
