DAVAO CITY – Gipa-ilalom na sa otopsiya ang patay nga lawas sa mag-live in partner nga gipatay sulod sa usa ka condominium sa bajada ning dakbayan sa dabaw niadtong milabay nga adlaw.
Gikanayon ni DCPO spokesperson Police Major Hazel Tuazon sa kasamtangan, gipaabot na lamang sa kapulisan ang mamahimong resulta sa autopsy report ug ang resulta usab sa gilusad nga imbestigasyon.
Na-una nang gikumpirma sa kapulisan nga anaa na karon sa ilang kustodiya ang usa sa duha ka mga persons of interest sa maong kaso nga taga Sultan Kudarat.
Dugang pa ni Tuazon nga subay sa imbestigasyon, nasayran nga ang duha ka mga persons of interest maoy nag-booked sa kuwarto sa usa ka condominium sa Bajada ning syudad nga maoy temporaryong gisak-an sa mag-live partner nga mga biktima nga sila Jeff Predas ug Jennifer Chavez.
Ania sa syudad ang mga biktima aron unta motan-aw ug concert niadtong adlaw nga Sabado Abril 20, 2024.
Samtang, miabot na usab dinhi sa syudad ang pamilya ni Jennifer Chavez, apan mibalibad kining mohatag ug pamahayag, hinuon gibutyag sa mga nahisgutan nga human ma-autopsy ang patay nga lawas niini, dalaon nila kini pauli sa ilang lugar aron didto ihaya.
Kahinumduman nga unang nakaplagan ang patay nga lawas ni Jeff Predas sa lobby nga bahin nga nakaangkon og napulo ug siyam ka mga samad dinunggaban pasado alas singko sa sayong kabuntagon niadtong Lunes.
Samtang, pasado alas dies usab sa gabii sa susamang adlaw nakaplagan ang patay nga lawas ni Chavez nga napuno ug samad dinunggaban sa sulod sa lawak sa maong condo.
Narekober sa mga otoridad ang kutsilyo nga gigamit sa pagpatay sa biktima.
Sa karon,gikompirma usab sa Bajada Police station nga walay naka-montar nga CCTV monitor sulod sa maong condominium building.
