DAVAO CITY – Kabsan sa kinabuhi ang duha ka magsuon nga nagtrabaho sa gitukod nga condominium sa may Buhangin-Cabantian Road, Davao City, bandang alas-2:36 sa hapon, Miyerkules, Hulyo 12.
Giila ang mga biktimang sila Noli Antao, 34 anyos; ug Garry Antao, 38 anyos; nagpuyo sa Manay, Davao Oriental.
Saysay sa ilang kaubanan, anaa sa 11th floor sa Amani Grand City Gate Condominium Building C ang duha ka biktima nga nagbutang lamang og hollow blocks.
Sa wa damha, nahugmak ang gitungtungan nila nga canopy.
Luwas ang kaubanan nga giilang si Helmer Nersa Samonte, 38 anyos, taga-Baguio District, Davao City, human kini miambak.
Apan, wala na kaluwas sa ilang kaugalingon ang duha ka biktima. Dali sab nga gitabangan og dala sa Southern Philippines Medical Center ang mga biktima apan parehas silang dead on arrival.
Kasamtangang gihaya ang patayng lawas sa magsuon sa usa ka punerarya sa Panacan, ning dakbayan.
via || Bombo LJF
