DAVAO CITY – Duha ka mga bata nga susamang nag-edad ug usaka tuig ang patay sa measles outbreak nga gikareport sa usaka barangay sa Mati City diin 24 ka lain pang uban ang natakbuyan.
Subay sa report sa City Health Office sa Mati City, apektado sa measles outbreak ang Purok Gemelina sa Brgy. Don Salvador Lopez, Mati City.
Gikatahong nagsugod ang outbreak sa ika-upat nga semana sa Hulyo niining kasamtangang tuig.
Nasayran nga sa 24 ka mga natakbuyan, duha lamang ang nadala sa balay tambalanan gumikan ang 22 niini ang gikanayong mga miyembro sa usa ka religious group nga gikanayong supak nga magpatambal sa bisan unsa man nga sakit.
Subay sa report sa CHO, moabot sa singko mil ka mga tawo ang nagpuyo sa maong barangay.
Moabot usab sa 483 ang nagpuyo sa Purok Gemelina diin 78 sa mga residente ang sakop sa nahisgutang religious group.
Mipahigayon na ang mga personahe sa City Health ug pagbakuna sa maong barangay kagahapong adlawa, apan nagdumili sa pagpabakuna o pagpatambal ang mga sakop sa maong religious group.
Tungod niini, padayon ang mga health authorities sa pagmonitor sa mga apektadong area aron mababagan ang pagkaylap sa infection.
