DAVAO CITY – Gikabutyag sa Department of Energy Mindanao Field Office nga dunay ipatukod nga mga power projects diri sa Davao Region.
Gikanayon ni DOE Mindanao Science Research Specialist na si Engineer Erick George Uy, muabot sa kinatibuk-ang 131 megawatts ang mahatag nga dugang supply sa kuryente gikan sa maong mga power projects nga naglangkub sa oil-based, hydro-based, biomass, ug battery storage systems.
Magbutang ang Supreme Power Corporation ug oil-based power plant sa Mati City, Davao Oriental nga makahatag og 11.04 megawatts.
Samtang 1 megawatt sab nga power supply ang matubag sa Osmena Hydroelectric Power Project gikan sa LGS Renewable Energies Corporation nga itukod sa may Governor Generoso, Davao Oriental.
Duna sab imuntar nga 10 megawatt Biomass Cogeneration Plant ang Davao Sugar Central Company, Inc. sa Hagonoy, Davao del Sur.
Samtang upat ka 20 megawatt battery systems ang ibutang sa Maco, Davao de Oro; Tagum City, Davao del Norte; ug Malita, Davao Occidental, lakip na ang 20 megawatt nga TMI Hybrid Diesel-Battery System nga itukod sa Maco, Davao de Oro.
Pipila lamang ka mga battery projects ang pagasugdan karong tuiga hangtud tuig 2023. Dugang pa niana, aduna pay laing 35 ka mga proyekto alang sa Mindanao nga makasupply ug kinatibuk-ang 859 megawatts sa kuryente.
Kahinumdumang gikupirma sab sa DOE Mindanao nga bastante gihapon ang power supply sa tibuok isla nga dunay natalang 842 megawatts gross reserve gikan Enero 5 hangtud Disyembre 15, ning tuiga.
VIA || Bombo LJF
