DAVAO REGION- Dakong tabang alang sa bastante nga suplay sa kuryente dinhi sa Mindanao ang dugang katukuran sa mga power plants nga gikan sa mga bag-ong investor.
Kini ang giluwatang pahayag sa opisyal sa Davao light and Power company luyo sa kabalaka nga adunay mahitabong kakulangon sa suplay sa kuryente sa tibuok isla sa musunod nga lima ka tuig kung walay bag-ong katukuran sa power plants.
Sumala pa ni DLPC President Rodger Velasco, nga adunay dakong panginahanglanon sa kuryente sa Mindanao ilabi pa dinhi sa dakabayan tungod sa mga kalambuan nga naangkon karong panahuna.
Sumala pa nga ning panahuna nagkadako na ang demand sa kuryente sa tibuok Mindanao nga mo-average na sa 2,100 megawatts, nga mas taas kung itandi sa 1,500 ug 1,600 MW niadtong panahon sa pandemya.
Gikanayon sab ni Velasco nga kining kakulangon sa kuryente sa moabot nga panahon kinahanglan nga mahatagan gilayon ug pagtagad aron nga dili moabot sa punto nga adunay amahitabo nga power crisis gumikan molungtad pa ug duha ka tuig ang pagkuha sa mga permiso gikan sa regulatory government agencies samtang molungtad sab ug tulo ka tuig ang pagtukod sa planta.
Usa sa mga gikonsidera sa opisyal ang renewable energy nga makahatod ug dugang suplay sa kuryente.
Gipasabot sab niini nga kung adunay daghan nga mga investor ang motukod sa mga planta nga moresulta sa bastante nga suplay, mamahimong mobarato usab ang kuryente dinhi sa Mindanao.
Una ng gibutyag sa National Grid Corporation of the Philippines, nga ang kasamtangang generating capacity sa Mindanao ang gibana-banaan nga anaa sa 2,975 MW ug ang labing taas nga panginahanglanon niini ang anaa sa 2,394 MW, nga adunay surplus nga 591 MW.
