DAVAO CITY – Mihatag ang lokal nga panggamhanan ug dugang cash assistance alang sa mga lugar nga apektado sa kusog nga pagtay-og partikular na sa Davao del Sur ug North Cotabato.
Tipik lamang kini human nga gi-aprubahan ni Mayor Inday Sara Duterte ang pagpagula ug P4.2 million gikan sa Quick Response Fund (QRF) sa siyudad.
Sumala pa kang City Disaster Risk Reduction Management Office (CDRMMO) head Alfredo Baloran nga ang dugang nga cash dakong tabang sa local government units aron nga masolusyonan ang panginahanglanon sa mga apektadong pamilya.
Ang nahisgutan nga kantidad ang ihatag sa mga lugar nga apektado sa milabay nga linog kaniadtong Oktubre 31.
Una ng mihatag ang siyudad ug P1.5 M sa lima ka mga lungsod nga apektado sa October 16 earthquake nga gilangkuban sa Bansalan, Magsaysay ug Matanao sa Davao del Sur ug Tulunan ingon man Makilala sa North Cotabato. Gitataw sab ni Baloran nga ang dugang nga P4.2 million tungaon sa mga apektadong lugar diin ang P1 million igahin sa probinsiya sa Davao del Sur ug Cotabato; P500,000 sa Kidapawan sa North Cotabato ug Digos sa Davao del Sur; samgtang P300,000 sa matag lungsod sa Mlang, Magpet, Matalam sa North Cotabato; ug Hagonoy sa Davao del Sur.
Gawas sa cash assistance, m,ohatag ang siyudad ug relief goods sa mga apektadong areas ug nagpadala sab ug mga personahe alang sa augmentation ingon man mga ekipo nga magamit sa ipahigayon nga search ug rescue operation sa Office of the Civil Defense in North Cotabato.
