Gilusad sa Philippine Drug Enforcement Agency (PDEA) Regional Office 11 ang 57th Regional Oversight Committee on Barangay Drug Clearing (ROCBDC) deliberation kagahapong adlawa, sa PDEA RO-11 Conference Room, DCPO compound San Pedro St. ning syudad sa Davao.
Gipangulohan ni Regional Director III Edgar T.Jubay, ang miting ug gitambongan usab sa mga representante gikan sa Department of the Interior and Local Government (DILG) Region XI, Department of Health (DOH) Region XI, ug ang Police Regional Office XI (PRO-XI).
Sa maong deliberasyon, gideklara sa komite nga drug-cleared na ang lima ka mga barangay.
Tulo niini anaa sa Davao del Sur: Barangay Dolo sa Bansalan, Barangay Coronon sa Sta. Cruz, ug Barangay San Miguel sa Digos City; samtang duha ang anaa dinhi sa dakbayan sa Davao mao ang Barangay Vicente Hizon sa Buhangin District ug Barangay Lamanan sa Calinan District.
Gawas pa niini, 23 ka barangay usab ang gi-validate nga nagpadayon ang ilahang drug-cleared status, lakip na ang usa gikan sa probinsya sa Davao de Oro, tulo ang gikan sa Davao Occidental, ug 19 ang gikan sa dakbayan sa Davao.
