DAVAO CITY- Gipasabot sa personahe sa Department of Trade and Industry 11 ang importansya sa pagbaton og pangalan sa usa ka negosyo kon Business Name.
Sumala pa Ethel Gelbolingo, Trade and Industry Development Specialist sa DTI 11, mahinungdanon ang pagbaton og Business Name nga magahatag og hulagway sa bisan unsang produkto o serbisyo nga hatud sa usa ka negosyo.
Laing pahimulos sab niini ang identity protection nga makapasalig nga walay lain nga magkapangalan nga negosyo. Dugang pa sa maong opisyal nga dunay katungod ang mga single proprietor kon solo business owner nga iparehistro ang ilang pangalan sa negosyo. Apan pagpaklaro pa nga dili kini lisensya ang business name registration alang sa pagsugod sa operasyon.
Dunay lahi sab nga rekisitos nga gikinahangan alang sa mga langyaw nga magparehistro sa mga business names ug kadtong mga franchiser nga magparehistro sab sa ngalan sa negosyo nga gikuha sa mga franchisee apan ilawom gihapon sa susamang linyada sa negosyo.
Aron manukad sa pagparehistro kon renewal sa ilahang mga business names, mamahimo sila nga makabisita online sa ilahang Business Name Registration System pinaagi sa website nga -bnrs.dti.gov.ph- aron maisyuhan og reference code aron dal-on sa pinakaduol nga DTI offices sa ilahang dapit.
Sa pikas bahin, gipasabot sa DTI 11 nga nakadepende ang validity sa registered business name sa asa gibutang ang physical store sa negosyo o ang ginatawag nga “territorial scope” nga mapa-barangay, city o national levels. Apan anaa lamang sa lima ka tuig ang gitas-on sa validity sa matag ngalan sa negosyo.
via // DMA
