Gipasabot ni Department of Social Welfare and Development (DSWD) Secretary Rex Gatchalian nga ang Php 80,000 nga pinansyal nga tabang nga gihatag ngadto kang Rose ang babaye nga nakit-an sa imburnal sa Makati dili kini usa ka ganti, apan usa lamang kini ka matang sa panginabuhiang hinabang nga gihatag subay sa kasamtangang mga assessment nga gihimo sa mga social worker sa ahensya.
Matod pa ni Secretary Gatchalian, ang kantidad nga gihatag dili lamang basta-basta giaprobahan, apan nahasubay kini sa evaluation nga gimugna sa social worker nga gi-assign sa kaso ni Rose.
Gipasiugda usab sa opisyal nga ang tanang kwarta nga ipang apod-apod ilawom sa nagkadaiyang programa sa DSWD maoy mosunod gayud sa mga existing guidelines nga adunay minimum ug maximum nga kantidad ug kinahanglan gayud nga muagi sa assessment.
Ilawom kini sa programa nga Oplan Pag-abot sa DSWD, diin aktibo nga nakigtambayayong ang ahensya sa mga pamilyang nagpuyo sa kadalanan.
Samtang, nangayo usab og pasaylo si Secretary Gatchalian ngadto sa mga social worker o sa bisan kinsa nga posibleng nasakitan sa paggamit sa simbolikong titulo nga “honorary social worker” nga gihatag kang Rose.
Ang maong pahayag gimugna human madawat sa ahensya ang nagkadaiyang komentaryo kabahin sa ilahang desisyon sa paghatag sa titulo ug pinansyal nga tabang ngadto sa maong babaye.
