DAVAO CITY – Nasikop sa kapulisan ang usa ka drug pusher atol sa gipahigayong drug buy-bust operation sa Purok Mangga, Brgy. Astorga, Sta. Cruz, Davao del Sur.
Gipanguluhan ni Police Major Crisaldo Gaila sa Provincial Drug Enforcement Unit (PDEU) ug Police Drug Enforcemnt Agency (PDEA) lead agent Mildred Driz Romero ang pagpahigayon sa maong buy-bust kagahapon, alas 12:00 ang takna sa kaudtuhon.
Target sa maong buy-bust ang usa ka drug pusher nga giilang si Jechan Maputi Madula alyas John-John, 42 anyos, minyo, tindero’g isda ug residente usab sa maong dapit.
Wala nakamatikod ang suspek nga sakop sa kapulisan ang ka transaksyon niini ug dali kining gisikop sa kapulisan.
Narecover gikan sa suspetsado ang P1,000 mark money, usa ka sachet sa gituohang shabu sulod sa bulsa sa suspek ug cellphone nga maoy gigamit sa transaksyon.
Temporaryong gibalhug sa bilangguan sa Sta. Cruz PNP si Madula ug gihikay na ang kasong kalapasan sa Republic Act 9165 kon Comprehensive Dangerous Drugs Act of 2002.
