Ubay-ubay na nga mga kompanya sa dakbayan sa Davao ang nagpahigayon ug Anti-drug Abuse program o drug-free workplace policy training kini aron nga mapahugtan pa ang kampanya batok ginadili nga droga sa mga kompanya nga adunay kapin 10 ka mga empleyado.
Sumala pa kang Ronaldo Rivera, operations head sa City Anti-Drug Abuse Council (Cadac), anaa na sa 979 ka mga kompanya ang ilang gipailalom sa training diin 62 niini ang nakapahigayon na ug drug test sa ilang mga empleyado.
Anaa na sab karon sa ika-38 nga batch ang ilang gipailalom sa training ug naglaom ang ahensiya nga matapos nila ang kinatibuk-ang 2,000 ka mga kompanya nga ilalom sa service sector.
Angayan sab sumala pa nga magkahiusa ang mga Barangay ug pribadong kompanya ilabi na nga adunay dakong papel ang mga nahisgutan aron masiguro nga limpiyo ang usa ka indibidwal batok sa paggamit ug ginadili nga droga.
