Gibungkag sa mga otoridad ang usa ka gituohang drug den human sa malampusong buy-bust operation nga gipahigayon sa mga personahe sa Philippine Drug Enforcement Agency Regional Office 11, kauban ang Panabo City Police Station ug Philippine Coast Guard Southeastern Mindanao, sa Purok Durian, Barangay Cagangohan, pasado alas Tres kagainang kaadlawon.
Sumala sa report sa kapulisan nga ang target sa operasyon nailhan nga alyas “Kakoy,” 40 anyos, gituohang nagdumala sa drug den, nadakpan human mibaligya og usa (1) ka sachet nga gituohang shabu nga gibug-aton og 1 gram ug adunay estimated street value nga ₱7,000 ngadto sa usa ka PDEA poseur-buyer.
Samtang lakip usab sa nadakpan si alyas “Weng” ug “Malou,” gituohang mga kauban sa maintainer, ug usa ka bisita sa drug den nga nailhan nga alyas “Jun-Jun.”
Narekober sa mga operatiba atol sa gikasa nga operasyon ang 12 ka sachets nga gituohang shabu sa nagkalain-laing gidak-on nga adunay gibug-aton nga 16 gramos ug estimated street value nga mokabat sa ₱112,000, uban sa nagkadaiyang drug paraphernalia ug ang marked buy-bust money.
Sa pagkakaron, ang mga dinakpan ang gikatakdang pasakahan og kasong paglapas sa Republic Act No. 9165, o mas nailhan nga Comprehensive Dangerous Drugs Act of 2002.
