DAVAO CITY – Gilusad sa mga sakop sa Regional Special Enforcement Team sa Philippine Drug Enforcement Agency Regional Office XI, kauban ang National Bureau of Investigation XI SEMRO, Davao City Police Office – CSOG ug Police Precinct 3 ang usa ka buy-bust operation nga miresulta sa pagkabungkag sa usa ka drug den sa Purok 52, Phase 1, NHA Bangkal, dinhi sa dakbayan sa dabaw.
Sumala ka Dir. Aileen T. Lovitos, Regional Director, Philippine Drug Enforcement Agency Regional Office XI , nga target sa operation ang usa ka Dolores Payot , alyas Yoyeth , 40 anyos, single, ug residente sa nasangpit nga dapit, nga naaresto sab gilayon gumikan sa pagbaligya niini ug usa ka sachet sa gituohang shabu nga mobalor ngadto sa Php 6,000 ngadto sa PDEA Agent nga nagpaka aron ingnon nga buyer.
Samtang, atol sa operasyon, arestado sab ang duha pa ka indibwal sa drug den nga sila Henry Dulog ug Michael Thadeus Bendigo, kinsa nasakpan sa akto nga nag shabu session sulod sa maong drug den.
Samtang, nakumpiska sab ang laing duha ka pakete sa gituohang shabu nga mitimbang og kapin-kulang 13 gramo nga adunay street value nga Php 195,000, nagkalain-laing drug paraphernalia ug buy bust money.
Kasamtangan anaa na sa kustodiya sa otoridad ang mga suspetsado samtang gihikay ang mga kasong ipasaka batok kanila.
Via || Hana Rallos
