DAVAO REGION- Sikop sa hiniusang pwersa sa Davao Oriental Provincial Office Philippine Drug Enforcement Agency Regional Office XI kauban sa Regional Intelligence Unit sa Police Regional Office XI ug Mati City Police Station ang 3 ka mga indibidual atol sa gimugnang drug buy-bust operation sa usa ka drug den sa Purok Mariezone, Magapo 2, Barangay Central, Mati City, Davao Oriental.
Lakip sa mga nasikop sa maong operasyon mao ang drug den maintainer nga si Edwin Mauren Poliquit alyas ‘Loyloy’, 57 -anyos nga residente sa maong nasangpit nga dapit.
Lakip usab sa mga nasikop mao sila Jason Lajera nga usa ka drug den employee ug Lloyd Kent Costa nga usa ka drug den visitor.
Nasakmit gikan sa maong mga indibidual ang gibana-banaang kapin ko kulang napulo ka gramo sa gituuhang shabu nga adunay standard drug price nga Php 68,000.
Lakip usab sa mga nakuha mao ang mga nagkadaiyang drug paraphernalia ug ang bodol money nga Php 1,000.
Ning kasamtangan ginahan-ay na ang kasong ipasaka batok sa maong mga indibidual nga adunay kalabutan sa pagsupak sa balaod sa iligal nga droga.
