DAVAO CITY- Daw final destination ang gikamatyan sa duha ka mga indibidwal kini human nga maunay sa bakal nga ilang gikarga, pasado alas 2 kagahapon sa hapon, Hunyo 26 ning tuiga.
Subay sa rekord, giila ang mga biktima nga mao sila Nestor Doronio, 56 anyos, usa ka driver ug residente sa New Ilocos Magsaysay Davao del Sur ug ang pasahero niining si KR Salem Rasonable, 24 anyos ug residente sa KM.82 Marber, Bansalan,Davao del Sur.
Subay sa imbestigasyon sa kapulisan, samtang naglawig ang trak nga ginamanehuan sa drayber, duna matud pay mitabok nga giilang si Evaloniie Intia Martinez, 32 anyos, usa ka Airport Security Assistant atbang sa Cargo Entrance sa Davao International Airport rason nga mihunong ang drayber,apan gumikan sa kalit nga paghunong sa trak, ang 50 kabuok nga 12 mm sheet file nga karga sa mga biktima ang misabay sab matud pa og lamba atol sa pagbreak sa drayber nga mipaingon ngadto sa mga biktima.
Gumikan niini, naangol pag-ayo ang mga biktima gumikan sa ilang pagkaipit ug hapit nga pagkatuhog.
Gilayong narescue ang 2 ug malampusong nabira, apan gilayon sab kining gideklarang patay gumikan sa hilabihang pagka-angol.
Gumikan sa maong panghitabo, nakamugna kini og bug-at nga dagan sa trapiko.
Samtang ang mitabok, anaa ning kasamtangang gikustodiya sa kwerpo sa kapulisan.
