DAVAO CITY- Patay ang usa ka drayber sa XR nga motorsiklo human nga nalatayan sa Dumptruck pasado alas onsi ang takna kaganihang udto sa Davao-Digos National Highway sa Brgy. Binugao, Toril Dist. ning syudad sa Davao.
Subay sa report sa Traffic Enforcement Unit sa DCPO, giila ang biktima nga si Melchor, 58-anyos nga residente sa Imelda Bunawan, Agusan Davao Del Sur nga nagmaneho sa Honda XR 150, samtang ang drayber sa truck naila nga si Epefanio Jr, 48-anyos residente sa Murcia, Conception Tarlac nga nagmaneho sa Sinotruck Hoka Dump Truck.
Subay sa imbistigasyon, ang duha ka mga sakyanan nagsubay sa nasampit nga highway nga gikan sa Población Toril, nga ang motorsiklo anaa nagsubay sa middle lane samtang ang dumptruck nagsubay sa inner lane.
Sumala pa sa mga nakakita, ang motorsiklo nahaybol kini atubangan nga bahin sa Ever Grand Steel Corporation, ug nabagnos padulong sa tuo nga bahin nga lane nga gisubay usab sa dumptruck nga maoy hinungdan nga nalabay ang biktima ug nalatayan kini sa truck ug maayung pagka-igo sa ulo niini nga miresulta sa iyahang kamatayon.
Sumala pa sa mga nakakita nga kalit ang maong panghitabo ug ulahi na nga nabantayan sa drayber sa Truck ang panghitabo.
Sa karon ang biktima ang anaa na gipahiluna sa Villa-Gan Funeral Homes sa Toril ning dakbayan sa Davao.
Samtang ang drayber sa truck ang anaa na sa kostudiya sa kapulisan.
