DAVAO CITY- Angol ang usa ka drayber sa motorsiklo human nga nabangga sa usa ka dump truck sa Sasa ning dakbayan sa Davao.
Subay sa report sa kapulisan, naila ang biktima nga si Norman Corpin, hamtong ang panuigon nga residente sa km-14 Panacan ning syudad.
Samtang angdrayber sa truck naila nga si Renerio Cadungog Taira, hamtong ang panuigon nga residente sa Pob.Libungan north Cotabato.
Sa imbistigasyon sa traffic section sa Sasa PNP, pasado alas jes ang takna kagabii nagsubay ang motorsiklo nga Yamaha Aerox sa Daang Maharlika highway kanto sa KM-10 Parula street, apan kalit lamang kining nabangga sa sa usa ka dumptruck sa junction nga bahin nga paliko pawala niadtong tungura.
Tungod sa kakusog sa pagkabangga nalagpot ang drayber sa karsada ug nakahiagom kini ug mga bun-og ug pangos sa kalawasan.
Daling girespondehan ang maong panghitabo sa BDRRMC sa Sasa ug gidala ang biktima sa Southern Philippines Medical Center nga karon padayon pa nga giatiman sa mga doktor.
Samtang ang motorsiklo ang nakahiagom ug danyos gumikan sa pagkapasok niini sa ilawom sa truck.
Sa karon ang drayber sa truck ang temporaryo nga gikostudiya sa kapulisan ingon man ang mga sakyanan nga nalambigit sa maong panghitabo.
