Padayon karon nga giimbistigahan sa kapulisan sa dakbayan sa Tagum ang usa ka insidente sa pagpanulis sa usa ka buntis sa mingaw nga bahin sa Fe Ayala Village, Barangay Mankilam dakbayan sa Tagum buntag sa adlaw nga Hwebes.
Subay sa report gikan sa kapulisan, giila ang biktima nga si alyas Rose hamtong ang panuigon residente sa Purok Bagani, Barangay Cuambugan, Tagum City, Davao del Norte.
Subay sa imbistigasyon sa mga otoridad, pasado alas 9:00 sa buntag misakay ang biktima og usa ka habal-habal nga motorsiklo padulong sa sentrong bahin sa siyudad aron mag- grocery.
Apan sa ilahang pagbyahe natingala na lamang kini nga lahi na ang gisubay nga dalan sa drayber hinungdan nga iyahang gisita ang drayber apan wala sumala pa kini paminawa.
Gumikan sa kabalaka buot unta niini nga maombak apan maglisod ang biktima sanglit Pito ka bulan na ang iyahang tiyan.
Hangtod nga mihunong sumala pa ang wala mailhing drayber sa maong dapit og mideklara kinig hold-up.
Sumala pa sa biktima, nakuha kaniya ang maroom nga slingbag nga adunay cash nga P78,000, ingon man ang mga ID, wallet, identification card, driver’s license, two (2) Land Bank ATM cards, grocery cards, PRC ID, one (1) Realme 12 Pro cellular phone, nga nagkantidad sa P 35,000.
Sa pagkakaron, ginapanubayan na sa mga kapulisan ang mga CCTV camera nga anaa sa dalan nga posibling giagi-an sa suspetsado.
