Dead on arrival ang usa ka 39-anyos nga drayber sa E-Bike human nga nabanggaan sa usa ka SUV kagainang kaadlawon.
Subay sa report sa kapulisan, nahitabo ang disgrasya pasado alas Dos ang takna kagainang kaadlawon sa R. Castillo Street, Agdao ning dakbayan sa Davao.
Giila sa kapulisan ang biktima nga si Hermino Sarin Dayagro nga residente sa Alterado, R.Castillo Agdao, dakbayan sa Davao.
Samtang ang drayber sa SUV ang giila nga si “Chen”. Subay sa inisyal nga imbistigasyon sa mga otoridad, nagsubay sa dalang R. Castillo ang pribadong sakyanan ug ang Electronic bike nga pampasayroan, apan kalit lamang nga gibanggaan sa likod nga bahin nga maoy hinungdan sa pagkalagpot niini ngadto sa 30 metros.
Tungod sa kakusog sa pagkabangga, nabunal pa ang E-Bike sa poste nga miresulta sa pagka-angol sa mga sakay niini ingon man ang drayber niini.
Dali nga gipangtabang ang mga biktima sa mga medical responders ug gidala sa balay tambalan.
Apan ang drayber sa E-Bike ang nakabsan sa iyahang kinabuhi gumikan sa mga bun-og ug bali sa kalawasan tungod sa nahitabo.
Sa karon nagpadayon pa ang gihimong imbistigasyon sa mga otoridad samtang anaa na usab sa kostudiya sa kapulisan ang drayber sa SUV ingon man ang nalambigit nga mga sakyanan.
