DAVAO REGION- Gikatakda nga kasuhan ang usa ka drayber nga nakabangga sa magti-ayon sa Crossing Magnaga, Pantukan Davao De Oro niadtong nakalabay nga semana.
Gibutyag sa mga atoridad nga sa karon ginahulat pa ang ubang mga dokumento gikan sa pamilya alang sa pagpasaka ug kaso batok sa drayber nga Niño Cañazares, 22-anyos pinaagi sa regular filing.
Nasayran nga una ng gi-inquest ang nahisgutan apan nabasura sumala pa ang kaso sa piskalya hinungdan nga gipagawas na lamang kini gumikan sa kakulangon sa mga dokumento.
Sa impormasyon gikan sa Pantukan Municipal Police Station nga ang nasampit nga drayber mitahan sa iyahang kaugalingon human sa maong panghitabo.
Kahinumduman nga patay ang magtiayon nga sila Joel ug Sharon Castilla human nga nabanggaan kini sa crossing Magnaga, Pantukan, Davao de Oro pasado alas 11:00 ang takna sa gabii, niadtong Hulyo 27.
Ngit-ngit sumala pa ang lugar nga posibling wala nabantayan sa drayber ang mga biktima. Gidala pa sa ospital ang babaeng biktima apan nakabsan gihapon kini sa kinabuhi uban sa iyahang bana nga dead on the spot niadtong tungura.
Gumikan sa maong panghitabo hilabihan ang pagbangutan sa mga anak ug kabanay sa mga biktima ug nanghinaot kini nga maangkon ang hustisya sa gidangatan sa mga biktima.
