Gidikit apan gitangtang dayon ang usa ka pahibalo labot sa flyover sa Maa diin gibutyag nga ang rason sa pagkalangay sa konstruksyon sa maong proyekto gumikan sa pagpangipit matud pa sa Marcos Jr. administrasyon.
Gani, gihilakip sab sa maong pahibalo ang mga apelyidong ‘Marcos’ ug ‘Romualdez’.
Sa karon, wala pa mahibal-an og si kinsa ang nagpilit ug nagtangtang sa maong tarpaulin.
Gipamatud-an sa Department of Public Works and Highways (DPWH) Regional Office XI nga bakak ug sayop ang mga gipakatap nga impormasyon sa social media nga nagaingon nga naatraso ang Maa-Magtuod Flyover Project tungod sa pulitikal nga isyu.
Giklaro sa DPWH XI nga fully funded na ang proyekto sukad pa sa tuig 2022, ug nga naa na sa 82.5% ang progreso sa civil works karong panahona.
Gibutyag usab sa ahensya nga gagamay na lang nga Road Right-of-Way (RROW) ang isyu nga ilang ginatubang, kalakip ang upat ka kabtangan nga gitagad nga urgent for acquisition ug kasamtangang ginaproseso.
Ang mga kabtangan dunay kalambigitan sa mortgage lien nga nagpahinay sa proseso, apan padayon ang koordinasyon sa bangko sa mga tag-iya sa yuta.
Gisiguro usab sa DPWH nga nakig-alayon ang Davao Light and Power Company sa pagrelokar sa mga poste sa Monteverde area ug nakaiskedyul kini buhaton karong Agosto 3, 2025.
Gipaabot usab ang tubag sa mga telecommunications companies para sa relokasyon sa ilang mga poste.
Gipasalig sa DPWH XI nga padayon nilang gihatagan og prioridad ang proyekto ug nga ilang tumong ang pagkumpleto niini sa tukmang panahon.
Gitawag nila ang publiko nga magmatngon batok sa misinformation ug musalig lamang sa mga opisyal nga tinubdan sa impormasyon kabahin sa proyekto.
