DAVAO CITY- Gipanaad sa Department of Public Works and Highways (DPWH) nga mugamit kini og “state-of-the-art modern technology” sa pagmugna sa Samal Island-Davao Connector (SIDC) project ilabi na sa lalom nga pundasyon alang sa sea-crossing bridge aron malikayan ang pagkadaot sa marine life.
Gikanayon nga adunay gi-andam nga investigation plan ang China Road and Bridge Corporation diin aduna kini kinatibuk-an nga 97 boreholes kung asa ang 63 niini ang mahimutang sa baybayon sa Davao, 18 sa gawas sa baybayon ug 16 alang sa baybayon sa Samal.
Gawas niini gilatag sab sa DPWH ang permits ug requirements gikan sa local government units ug national government agencies ug walay pagbabag niini ang LGU sa Island Garden City of Samal ingon man sa Davao City. Nasayran nga ayha makuha ang Environmental Compliance Certificate (ECC), gimugna nang daan sa national government ang Multipartite Monitoring Team (MMT) ug gi-establisar ang Environmental Monitoring Fund (EMF) lakip ang Environmental Guarantee Fund (EGF).
Gawas niini, ang Department of Environment and Natural Resources – Environmental Management Bureau (DENR-EMB) ang nagpaguwa sa maong ECC kaniadto pang Disyembre 2020 ug giangkon sab sa DPWH nga ang Protected Area Management Board (PAMB) nagpaguwa og resolusyon kaniadto pang Oktubre 2020 nga naghatag og clearance ug pagsuporta alang sa SIDC project.
VIA|| Kaye Marie Gulle
