DAVAO CITY – Namahayag ang Department of Public Works and Highways – Davao Region mahitungod sa giluwat nga panawagan ni Davao City Mayor Sebastian Duterte kalabot sa nag-ung ong nga unfinished projects sa buhatan dinhi sa dakbayan.
Gikanayon sa tigpamaba sa DPWH-Davao nga si Dean Ortiz nga “well-coordinated” ang tanan nilang mga proyekto sa local government unit.
Dugang pa nga gikinahanglan alang sa rehiyonal ug distrito nga mga buhatan sa DPWH nga makig-alayon pag-ayo sa mga local government units aron madungog ang mga opinyon ug rekomendasyon sa naulahi aron makunhuran ang kahuot sa trapiko.
Nanghinaot sab si Ortiz nga makapahigayon kini kanila og isplekar nagdto sa mayor mahitungod sa pending nga mga proyekto nga sumala pa sa mayor, makalisang sa mga motorista.
Sumala sa Updated Civil Works Annual Procurement Plan 2024 sa ahensya, gibana-bana nga mokabat sa P510 milyones nga budget ang ma-procure sa 16 ka mga proyekto para karong tuiga, lakip na ang pagtukod og multi-purpose buildings, road revetment construction, ug water systems.
Kahinumduman nga gisita sa mayor ang ahensya ingon man mga contractors sa mga road projects gumikan sa gikatahong pagbakbak sa mga kalsada nga anaa sa maayong kundisyon ug pagbiya sa mga proyektong wala pa gihapon nahuman.
Nanawagan ang mayor nga makig-alayon sa City Transport and Traffic Management Board aron pagseguro sa gikinahanglang mga permit sa dili pa magpahigayon og bisan unsang aktibidad nga makadaut sa kahimtang sa dalan sa dakbayan.
