Mibutyag si Dean Ortiz, spokesperson sa DPWH Region XI, nga nahimong produktibo ang sesyon nga gihimo sa 21st City Council of Davao tungod kay personal nga nasuta sa mga konsehal ug sa DPWH ang mga isyu kalabot sa implementasyon sa Maa-Magtuod Flyover Project.
Matod ni Ortiz, nakita mismo sa mga konsehal ang kahimtang sa proyekto ug ang pagka-urgent sa partisipasyon sa mga utility companies sama sa Davao Light and Power Company (DLPC) ug mga telecommunications company. Tungod sa ilang kooperasyon, mas napadali ang proseso sa pagtubag sa mga problema.
Gipasabot usab sa DLPC ug telecommunications companies na nga gi-ayo na nila ang pagtrabaho sa mga poste aron makapadayon ang DPWH sa konstruksyon. Plansyado na sab ang road right of way human nga nakigkooperar ang mga tag-iya sa naapektuhang mga propriyedad.
Dugang pa ni Ortiz, nakasabot sila sa katawhan bahin sa kahasol ug kalangay nga dala sa proyekto. Apan iyang gisiguro nga matapos kini sulod sa gikatakdang panahon. Gibug-aton usab niya nga ang RROW issues ug ang koordinasyon sa utility companies maoy hinungdan sa dugay nga proseso apan sa pagkakaron, mas klaro ug hapsay na ang dalan padulong sa pagtapos niini.
Sa kasamtangan, nagpabilin ang flyover project nga usa sa labing gi-prayoridad sa dakbayan tungod kay gilauman kini nga makahatag ug dakong kaayohan sa trapiko sa daplin sa Maa ug Magtuod, diin matag adlaw liboan ka mga sakyanan ang naga-agi. Matud pa sa mga opisyal, kung matapos kini, makunhuran ang grabeng pagguot ug mas mapaayo ang dagan sa transportasyon sa tibuok syudad.
Giklaro sab sa DPWH nga padayon ang koordinasyon sa contractor ug mga utility companies aron malikayan na ang dugang kalangay ug aron masiguro nga masunod ang mga sumbanan sa safety ug kalidad sa konstruksyon.
