DAVAO CITY- Naluwas ang dose ka mga ihap sa mga kababayen-an nga biktima sa usa ka unauthorized recruitment agency atol sa gilusad nga entrapment operation sa mga otoridad sa Magallanes Street, ning dakbayan, kagahapon sa hapon.
Sumala pa ni Atty. Arcelito Albao, Regional Director sa NBI XI nga nadawat nila ang request gikan sa Department of Migrant Workers nga matud pa illegal nga pag-operate sa Bahrain Davao Human Resource Specialists bisan paman walay permit o igong dokumento.
Atol sa gilusad nga entrapment operation, tulo ang nagpakaaron-ingong poseur applicants rason nga nasuta ang kalapasan sa maong agency nga nagapa- in house.
Dugang pa nga dugay na nga nagaoperate ang maong agency ug gani gikan pa Marso nakastay sa maong lugar ang dose ka mga biktima.
Gisaaran matud pa sila nga makatrabago isip Apple picker ug domestic worker sa Bahrain, Middle East, ug Poland.
Posibleng mapasakaan og kasong syndicated and illegal recruitment ang maong ahensya diin nakalatid sa RA 8042, ammended by RA 122.
Subli usab nagpahimangno si Atty. Albao sa mga boot manarbaho sa langyaw nga kanasuran nga i-verify una ang ahensya ayha nga moapply kung nakarehistro ba kini sa Department of Migrant Workers o di kaha sa uban pang law enforcement agencies.
