DAVAO CITY- Mokabat sa dos milyones ang kantidad sa palusot nga sigarilyo ang nakumpiska sa kapulisan atol sa checkpoint kagahapong adlawa, diin tulo ka mga indibidwal ang nadakpan human sa gikasa nga operasyon.
Subay sa report gikan sa Buhangin PNP, giila ang mga dinakpan nga sila Allan Cosal 30-anyos, minyu nga residente sa Prk. Biatellis, Maragusan Pob., San Mariano, Davao de Oro.
Kauban usab niini ang duha ka mga Chinese national nga sila Zizhan Pan alias “PAN” 51-anyos, minyo nga residente sa SUN MY Hotel, Dacudao Ave, Brgy Paciano Bangoy, ning syudad sa Davao, ug si Dehong Qi alias “DEHONG” 37-anyos nga residente sa Brgy 1, Manila.
Sumala pa sa kapulisan pasado alas singko ang takna sa hapon, gilusad ang operasyon sa Purok 8, Bypass Road, Communal, ning syudad sa Davao nga miresulta sa pagkakumpiska sa mga kinarton nga kargamento sa palusot nga sigarilyo nga gikarga sa Elf Truck ug Honda CRV sa nasampit nga lugar.
Sa pagpasusi sa mga otoridad adunay 155 ka mga karton sa New Berlin ug 15 ka mga kinarton sa Bros nga sigarilyo nga sa kinatibuk-an anaa sa 8500 ka mga reams nga nagkantidad ug P2 million pesos.
Nasayran nga walay mga dokumento usab ang mga sakyanan nga gigamit sa mga nahsigutan ug ingon wala kini nakasuot ug seatbelt atol sa pagdakop niini samtang sakay sa mga nasampit nga sakyanan nga kini kasong kasupakan sa balaod trapiko.
Samtang kasong pagsupak sa RA 10643 kon “The Graphic Health Warnings Law” ang atubangon sa mga dinakpan nga karon anaa na sa kostudiya sa kapulisan.
